بقلم: سهيل يوسف ابو سعين
كعادتها لم تفي الهيئة القومية للكهرباء بوعودها وقطعت التيار الكهربائي من أول يوم لإمتحانات الشهادة السودانيه
وكان الظلام هو هديتها للطلاب في أيام يحتاجون فيها لكل ثانية من الزمن للمذاكرة
حكومة لاتستطيع توفير أبسط حقوق مواطنيها عليها أن تراجع حساباتها جيدا وتراجع الميزانيات التي تصرف علي سفاسف الأمور
مؤسف أن تقطع الكهرباء في عز إمتحانات مصيرية تحدد إتجاه مستقبل الطلاب
مؤسف أن تكون تصريحات المسؤلين (كلام ساكت بشيلو الهبوب )علي قول أهلنا
لو ماقادرين توفروا إستقرار كهربائي لمدة إسبوعين منتظرين شنو؟؟
أعتقد بأن هنالك أدبا يسمي أدب الإستقالة
كل الدول تجاوزت قطوعات الكهرباء إلا السودان
بالرغم من وجود كل مقومات توليد الكهرباء
لدينا قطوعات بالساعات وكمان مجدولة
لدرجة إنه الناس بقت تبرمج حسب يوم الكهرباء
لو عندك مكوة
ولو جاينك ضيوف
ولو عندك مشوار تطلع يوم الكهرباء قاطعة
والعنده.مناسبة يبرمج مع الكهرباء
أصبحنا ندير حياتنا وفقا للكهرباء
بالإضافة للتعريفة الخيالية لسعر الكهرباء
نحن ندفع قروش الكهرباء ويقطعوها بالساعات يكونوا عاوزين يوفروا لينا عدد الساعات التشغيلية للأجهزة الكهربائية ؟
والأروع إننا نشتري العداد ويقولوا ليك العداد ملك للهئية القومية للكهرباء
غايتو ياناس الكهرباء قصصكم كترت
وكلها كوم وقصة قطع الكهرباء مع الامتحانات دي كوم تاني
