مارس شهر المرأة بلا منازع فيه يحتفل العالم بعيد المرأة …ويحتفل بعيد الأم
شهر خصصت أيامة ليقف العالم سلام تعظيم لحواء الأم والاخت والصديقة والزوجة والحبيبة
فجميع النساء رائعات بشكل أو بأخر لايوجد إمرأة وإلا تحمل في كتفيها الضوء لمدينة كاملة
سلام علي غزالات العمل وستات البيوت
سلام علي الأستاذة والعاملة وست الشاي
سلام علي كل إمرأة توشحت بثوب العطاء
سلام علي أمي وخالاتي وعماتي وكل من تمت لي بصلة برباط نون النسوة
سلام صديقاتي …زميلاتي ….اللأئي تقاسمن معي الوجع والفرح
سلام لكل من علمتني حرفا وقلدتني قلادة عز لأكون أنا
سلام معلماتي سلام
سلام لكل إمرأة شردتها الحرب وأبكتها الفاجعه وسكنها الحزن
سلام لكل أم سهرت وربت وعلمت ومازالت
سلام علي كل من تحمل المنجل وتحصدوتزرع
سلام علي كل من نقشت الحناء ….ومشطت شعرها…..ونسجت وغزلت
سلام للمرأة السودانية …ست البيت ..الفنجرية….البتكرم الضيف وبتقول حباب
سلام علي الكردفانيه والدارفوريه والشايقيه والدنقلاويه والجعليه والأدروبيه …سلام بت السودان …حفيدة الفرسان ….سلام المكندل في طريفها ودع …ست القرمصيص والتوب والجدلة ..والدلكه والأبري والرقاق
سلام ست الكسرة والصاج
سلام ست الدوكة والدلوكه والمردوم والشبال
سلام ست النفر والميرم تاجا ورابحه وسلوي ورندا وفطومه ونجوي ومريم
سلام ست البنات …ست الفريق…ست اللهيج…السمحه
سلام بت بلدي
سلام ليك أم الشهيد…بت الشهيد ..زوجة شهيد…..بت الوطن
سلام بت النيل …بت ترهاقا وبعانخي…
سلام ليك ست القهوه وقليه بنك…ملانه حن ..وبخور طالقاه يملانا إلفه وحب وسلام
سلام العازه المجرتقه….ومهيره بت عبود …والغنيه المعتقه
سلام البدرت والمدرت والخدرت أمالك
سلام سودانية بت الاصول والبيوت المن بعيد معنيه
ست القدح والطبق والروب والتقليه والملوحه ست المطبخ
سلام بنيتي رقيم..وكل صحباتك طفلات يملن قلوبنا بالبهجه
سلام أم الضيفان …أم الفقراء
أم العيال….
سلام سودانية
