يمين نرجع….
نعود للبيت ونملا الزير
يمين نرجع نقش الحوش
ونسقي شجيرة الليمون
يمين نرجع نشيل القفة نمشي السوق
ونتحاوم نخش من جار لى جار ونتسالم
وشاينا الأحمر المضمون
معاه زلابية زي زيتون
صباح الخير عليك يابا…
صباح الفل والياسمين
وكيف أصبحتي يا يمه…
وخالك جوه في الصالون
تعال يا بنية صحيهو…
وزيدي فحيمة الكانون
يمين نرجع وفي جامعنا نتقابل
وفي الاداب بنتقابل وفي القانون
ونقعد نبدأ في البنيان..
وبكرة تنور الخرطوم
وشافع الروضة في الترحيل يعود مأمون
يمين نرجع نوسع رقعة الماعون
وبكرة ننزل الدولار
وبكرة نصدر البترول
ويزرع كل زول هكتار
يمين نرجع نكفكف دمعة المحزون
نعزي الناس نواري الشهدا أولادنا
ترابنا الطاهر الممنون
يمين نرجع و نكنس مننا البيخون
ونطرد من بلدنا عفن
وترجع دولة القانون
