صابر من رجل المال الأعمال المعروفين لديه كثير من الأعمال بين جمهورية السودان ودولة قطر وهو قطب هلالي معروف لدي القاعده الهلاليه جلسنا معه في تفاصيل الهلال والعديد من الأشياء الي مضابط الحوار:
ضربه البدايه؟
مرحبا بيك وبي كل الشعب السوداني عامة وجماهير الهلال بصورة خاصة نترحم علي أرواح الشهداء وعاجل الشفاء للمصابين.
ماهي اخر نتائج الجمعية العمومية لنادي الهلال؟
الحمد لله تمت بخير بنجاح 90%تم إجازة النظام الأساسي لنادي الهلال من اللجان العدلية وتمت بطريقة منظمة بقاعة الصداقة بترتيب جميل نشكر به لجنة التسيير علي رأسها السيد هشام السوباط والاخ العزيز عثمان إسماعيل والاخ نزار العوض مالك والاخ رامي كمال والسيد الفريق السر والسيد امين المال هولاء قاموا بمجهودات جبارة والحمد لله بدأ الهلال يحكم نفسه بنفسه وفي انتظار الانتخابات.
مارايك في لجنة التسيير الحالية بقيادة السوباط؟
نفذت مشاريع بنجاح وفشلت في بعض المهام بنجاح نقدر نقول أنها نجحت بنسبة 55% و45%عدم توفيق وبنشكرهم علي النجاحات وهاردلك للأشياء الماتوفقوا فيها.
الهلال حصاده القاريه في البطولات صفر ماالسبب؟
المشكلة في عدم اختيار المحترفين بطريقة مدروسة واحترافية ومشاكل الإدارات وضعف علاقتها بالكاف ثالثا مشاكل الملاعب وعدم تأهيلها والأهم من ذلك الاهتمام بالمدارس السنيه والناشئين والاكاديميات بحيث نقدر نفرخ لاعبين علي قدر المستوي كما تعمل كل فرق شمال افريقيا.
هل اذا تم انتخابك وتعيينك رئيس نادي الهلال ستعالج بعض القضايا ؟
انا شايف المشاكل امامي فالاخطاء التي وقعت فيها المجالس السابقه نقدر نتجاوزها ونمشي في المسار الصحيح واختيار لاعبين بطريقة احترافية بدل اجيب ٦لاعبين محترفين اجيب ٣لاعبين يقدروا اصنعوا الفارق فنحن نقدر ندير الهلال بطريقة جميلة ونتفادى أخطاء الغير
مارايك في مقولتك الشهيرة” مافي زول بحب البلد دي غيري ؟
لانو انا بقدم للبلد وكل اهل السودان والبلد لم تقدم لي شئ معظم الناس القدموا للسودان استفادوا منه وانا مالقيت حاجه ولكن في النهاية ده واجبنا لأننا ترعرعنا في هذه البلد وانتماء مننا للسودان ولكن كمصالح خاصه زيرو.
هل لديك راي في الشئون السياسية التي تمر بها البلاد؟
لازم الناس تتوافق لانو لايمكن اي يكون نظام الحكم عسكرياً بعد ثورة ديسمبر المجيدة لان كل الشعب يتتطلع لحكم مدني ديمقراطي لكن لابد أن تكون المدنية بسوق سليمه ومرتبة مبنية علي الحوار والتشاور وايضا باصتحاب الشباب ولجان المقاومة والمجلس التشريعي كده البلد تكون متجه في الاتجاه الصحيح والسودان بلد غني بموارده ويمكن أن يكون أفضل بلد في الوطن العربي بأكمله بتمني توافق بين العسكريين والمدنيين في اقرب وقت تفادياً للحروب الأهلية انا مع الشباب ولجان المقاومة وهم صنعوا التغيير وبتمني ايقاف القتل والتفاهم مع قضايا الشباب وفي نفس الوقت لازم يكون هنالك قوات نظامية قادرة على حماية البلاد وحفظ النظام وهي منظومة متكاملة لايمكن أن تكون البلاد بلا شباب وأيضاً لايمكن أن تكون بلا جيش وشرطة لحفظ وتأمين البلاد والعباد.
ماهي اعمال الخندقاوي الخيرية؟
كل أعمالنا الخيرية تحت مظلة منظمة الخندق الخيرية ابتداءً من العلاج والتعليم والأسر الفقيرة نحن شغالين بطريقة مرتبة وبنساعد عدد مقدر من الأسر المتعففة وبنعمل كرتونة رمضان كل عام وهدية العيد أيضاً كل سنه وخراف الاضحى وبالإضافة إلى مساعدة في علاج عامة الشعب السوداني والساده نجوم المجتمع والفن وايضا في ملف التعليم نقوم بصيانة وتأهيل المدارس وايضا نقف مع منكوبي الخريف تحت راية منظمة الخندق الخيرية.
كيف تتعامل مع الاشاعات ؟
الإشاعات كثيرة في اشاعات بضايق وفي اشاعات تسخر منها حسب نوع الإشاعة انا من ٢٠١٤ تعرضت لاساءات واشاعات كثيرة أبرزها زواج الخندقاوي من ندي القلعة لانها أخذت رواج كبير الكلام غير صحيح وندي القلعة اخت عزيزه علي
عايز أسألك عن بعض الأشخاص في كلمتين ؟
1كمال ترباس
فنان عظيم وفنان شعبي مخضرم
2الارباب صلاح احمد ادريس
من رؤساء الهلال الاذكياء ويكفي أنه حكم الهلال لدورتين وكان قريب من الحصول على دوري ابطال اوروبا
3الصحفي احمد دندش
صحفي مخضرم وذكي بيعمل شغل بطريقة جميلة وكسب العديد من الناس وانا اعتبره من اميز الإعلاميين السودانيين .
4عمر البشير
رئيس مخلوع
هل انت راضي عما يكتب حولك في الاعلام ؟
والله في ناس بيكتبوا الحقائق وفي ناس بي اللفوا الإشاعات ده كلو ماعندي فيه مشكل انا عندي نظرية انو سوا أكان النقد سلبي او ايجابي بصب في مصلحة صابر شريف الخندقاوي.
كلمه اخيره لك
بشكركم جزيل الشكر ونورتونا وشروفتونا وبقول لكل القراء كل عام وانتم بخير انشاء الله الهلال بطل افريقيا والسودان ينظم كأس العالم والله … الوطن … الهلال.
