حليل زمن الحنان يابا
بقلم عبد القدوس الشيخ ابراهيم
زمان كان عباره تدل علي وضعيه حدث مضي حدوثه مع بيان الطريقه التي يحدث بها وتوحي للمستمع بغرابه ماسيسمع مما يحرك فطرة الشغف داخله ليذيد لهفته لمعرفه ماسيعقب هذه العباره من حديث لان لفظها يوحي لاحساسه سماع مالم يسمع من قبل هذا بالنسبه لعامة الشعوب اما بالنسبة لنا كشعب سوداني فقد ارتبطت هذه العباره بالتحسر علي الماضي وجمالة واصبحت تقال من باب التندم علي الماضي والعتب علي الحاضر والمسير للجدل اصبحت كل الاحداث والوقائع اليومية بكل معانيها ومفاهيمها تعقب كل واحده منها كلمه ياحليل زمان!!
لااعلم اهي بكاء علي مايحدث ام شوقاً لما حدث في ذاك الزمن الذي ياح ليله وكيف نوصف ياح ليل هل ياح بمعني انتهي ام ياح تعني بشروق الشمس التي اذهبت الليل لغه سودانية ذات عمر طويل لانفهمها نحن ابناء الالفينات وتحتاج الي تفسير حبوبه وان لم نجدها فياحليل زمن الحنان يابا،،
وبما اننا نتحدث عن زمان وبراة اهله وطيبتهم وبساطت نفوسهم الطيبه ومااجمل اهل السودان زمان واسي لان الاصل في الشعب السوداني ماسبق ذكره من طيبه وحسن نوايا ونفوس من الحاجات الدالة علي جمال الانسان السوداني قديما وبساطت فكره وزي مابقولوا اهلنا زمان كل زول في همو ونموزج لهذا احد الاجداد كان شاباً وكان عملة في ذاك الوقت ضرب الطوب واثناء قيامه بعمله بين حيضان الطين وهو يضرب في طوبه كما يقولون اتاه احد المثقفين وهو علي عجل ودهشه فنادي عليه ياعم حسن انت بتدق في طوبك ماجايب خبر توقف العم حسن وتوقف عن العمل ظن ان احد سكان القرية قد اصابه مكروه او قد تكون احدي الحوامل قد اجهضت فسال الشاب وقد بدت علي ملامح العم حسن الخوف والزعر الحصل شنو ياولدي؟ فرد الشاب لقد انقلبت حكومه نميري وتولي الشويعين الحكم يعني ياعم حسن الحكومه انقلبت فهدات حالت العم ثم سال الشاب القلبوها ديل بحموني ادق طوبي؟ رد الشاب لا ولكن وقبل ان يكمل رد عليه العم حسن مادام مابحموتي ادق التنقلب ان منقلبه،،، مبروك وهذا من باب خليك في شغلتك ودي سياسة القيام بالمهام الخاصة والمابخصك مابحميك شغلك،،
والمابشيلوا ليك الفاتحه فيه ماتحرس صيوانو والبكي بحرروه اهلوا،،،
اما اليوم بتاع الطماطم يتحجج لزياده كوم الطماطم ولمن تسالو ليه الكوم بي الف اتحول ليك من بايع طماطم لي محلل سياسي ويبداء البلد ماشه في هاوية الدولار طار البورصه وقعت والدراسة اثبتت فشل الموسم الزراعي بسبب تدني عوووووك اسوقك سواقه عجيبه اديك احساس انو الناطق الرسمي لقوات الفريشين مع انو بتاع الطماطم زمان ان ذادت اجاوبك ببساطه وبي كلام واقعي مثلا السنه دي الافات خربت الجناين واللقطه الكانت بتجيب عشرين صفيحه اسي بتجيب خمسه صااادق ياعمك دي الاجابة بالله ماليهم حق اقولوا ياحليل زمان،،
ونموزج تاني اولاد عم متخاصمين في قطعه ارض بمشو للمحكمه اتونسو سوا واجو سوا وقفو قدام مولانا وحكمها لي واحد فيهم وطلعو بره قال المحكوم ليه الارض لي المخاصمو الحمد لله ارضي جاتني والحق ظهر وعلي الطلاق اكان اقسمها ليك النص نص ليك ونص لي محكمه اهليه مليانه تسامح وعاطفه من باب الاستئناف العاطفي واعادة الحكم من اجل بقاء المحبة والمحنه بالله مش ياحليل زمان،،،
زمان كان الزمن جميل هذا مايقوله الكبار حين بتحدثون عن ماضيهم الطيب والحقيقه ليس الزمن من كان جميلاً انما جمال نفوسهم من جمل الزمن فالايام ماذالت في ترتيبها السبت الاحد الي الجمعه لم يتغير فيها شي ولكن هل مفاهيم الناس كما هي وهل الموده التي كانت تسود الشعب حينذاك موجوده في قلوبنا اليوم؟ ان كانت الاجابة بلا فماذا جري لنفوسنا هل دخول الحضارات وتطور الاليات والتكنلوجيا وتوفير سبل التواصل قد قطعت التواصل العاطفي بيننا ام شكلت شاغلاً اصاب عقولنا بجنون الجفاء ام سقطت تقاليدنا التي تعمل علي بث روح الاخاء والتعاون والتراحم بيننا وكان توفر وسايل التواصل قد صممت لتقطع التواصل فايهما اشد صعوبتاً ان تركب سيارتك المكيفه لتصل اخا يبعد عنك مساحتا ام ان تشد سرج الحمار الذي انزلته قبل قليل حين عدت به من الضحوا لتذهب علي ظهره وسط حر الشمس لتتفقد قريباً لك لم تراه لايام وخشيت ان يكون مريضا حقيقتا ياحليل زمان وبالمناسبة العندو تفسير لي ياح ليل ادلنا عليها اما بالنسبة لي فانا افهم ماتعني ولا استطيع ان اكتبة لانني احس معناه ولا اعرفه ياحليلي اكان جنيت
