بكره حنرجع لبيوتنا ونقالد الرفاق ونملأ عيونابملامح منازلنا
محل قعدتنا وضل ونستنا ولمة قهوتنا
وترجع ياوطن زي ماكنت ويضج موج النيل بالفرح
ونطرز من نجيماتك فستان مزكرش بي قوس قزح
ونبنيك من تاني مابنتعب ونفديك بالروح والولد
أصلو القصة يابلد
قصة عميل قبض الثمن باع الوطن
وقصة ناس إتفقوا علي الدمار علي الخراب حالفين يهدوه البلد
ويطمسوا هوية كل سوداني
وفي البيوت يتحكروا
إلا نحن
يانا نحن
أحفاد مهيره
ناس بعانخي وعلي دينار
ناس الأمير هارون والمك
تاريخ المهديه
نحن راضعين من النيل ثباتنا
موروثنا قديم من أبواتنا
نحن الشرق ونحن الغرب ونحن الجنوب و الشمال ونحن الوسط
نحن ناس بارا وكسلا والرهد أبودكنة
ناس أمروابة وفاشر السلطان والنهود والدمازين
نحن ناس تورشين وكسلا والبورت ومتمة دار جعل
نحن ناس عطبرة وكوستي والجزيرة الخضراء
نحن حلفا ودنقلا
نحن الخرطوم
ناس أمدر وقبة المهدي والنيل والطابية وكرري وأم دبيكرات والأحفاد أمدرمان الإسلامية
نحن بحري وشمبات والمتحف الحربي
ونحن الخرطوم والحضارة والأصالة
نحن التاريخ والعز والعراقة
نحن الأزهري ومحمد المحجوب والطقاطة وليلي المغربي نحن عبدالله الطيب إدريس جماع والتجاني الماحي
نحن وردي والفاضل سعيد ود الأمين وهاشم صديق والتجاني حاج موسي وروضه الحاج وحنان النيل وسعادة عبدالرحمن
نحن الحوت وزيدان
نحن تاريخ طويل وعريض ونحن ناس الكرم والجود..ناس الديوان وقدح الخير البسابق في السلام مليان وناس حرم ويمين
نحن هشاب ونخيل وتبلدي…نحن دهب وبترول
نحن ناس الهجعة…..رجال الذكر ناس الخلاوي والتقابة …ناس النوبة وقيام الليل
نحن طرق صوفية وميدان المولد ورجال حوبه وناس فزع
نحن ناس ريف وأفندية
نحن ناس توب وجلابية….ومركوب وسديري
نحن أسياد بلد
أهل البلد وبكره نرجع و بالألفة نعمر بيوتنا وبالحب نبني بلدنا
